الفيدباك Feedback

 

متخفش من الفيدباك! 

في فرق كبير بين إنك تبذل أقصى ما عندك وييجي لك فيدباك على الملف وإنك ييجيلك فيدباة علشان غلطان...مستهتر.. مش مهتم بالتفاصيل...

دورك ناحية الملف اللي في إيدك بيكون كالآتي:

تتصفح الملف وتحاول تقرأ ولو فقرة في كل صفحة أو كل كام صفحة.. منك هتكسر رهبة الملف وهتاخد فكرة عامة عن موضوعه...

تبحث على جوجل عن موضوع الملف... موجود... اقرأ عنه شوية باللغة اللي هتترجم إليها..

بكدة.. هتكون قدرت تعرف المصطلحات اللي هتستخدمها.. وسياق الكلام..
تخيل مثلا إنك بتترجم حكم محكمة... لا سمح الله :) ..بهزر طبعا... (((الأحكام جميلة)))
محتاج تشوف المصطلحات المستخدمة في محاكم الدولة اللي صدر فيها الحكم... على أد ما تقدر طبعا..

مثلا: عندنا في مصر Court of Cassation
دي محكمة النقض...

في الإمارات مثلا.. محكمة التمييز

ولو بتترجم بحث عن التعليم في دولة معينة اقرأ عنه وعن مصطلحاته في نفس الدولة...
متكسلش

وخلي بالك: كل دقيقة بتقضيها نحو إتقان الترجمة.. بتضيف لك.. بتحسن مستواك.. بتعودك على الدقة... وبتعود عليك ببركة في الوقت والرزق..

"إن الله يحب إذا عمل أحدكم عملا أن يتقنه"

خلصت ترجمة؟ دورت على كل كلمة ومستهنتش...؟ شفت السياق وحافظت عليه؟
وقبل كل ده.. فهمت خريطة الملف ولا كنت بتترجم وأنت مش مركز؟ :)
لو عملت كل ده.. وركزت في كل كلمة.. راجع الملف كويس وابعت.. ومتشلش هم الفيدباك.

جالك فيدباك؟

عادي..
كويس؟ .. ممتاز!
مش تمام؟

بردو عادي...أنت عملت اللي عليك زي ما قلنا.. ومسبتش حاجة تعدي.. ومبعتش إلا وانت بتقول: "ليس في الإمكان أفضل مما كان "

كدة الفيدباك اللي جتلك دي هدية:
ممكن يكون العميل أكثر خبرة منك وباعتلك حاجات تتعلم منها.. اقرأها كويس واعتبر إنها فعلا هدية مبعوتالك علشان تحسن من مستواك..
ممكن كمان تكون الفيدباك ملهاش لزوم.. زي مثلا.. عميل باعتلك الملف ومغير كلمة مكان كلمة والاتنين بنفس المعنى.. أنت كدة مش غلط.. بس حاول على أد ما تقدر تلتزم باللي هو عايزه.. ما دام صح..

المقصود: متاخدش الفيدباك على أعصابك.. مش كل الناس بيبعتو فيدباك علشان يقولولك "أنت مترجم أي كلام" ..اللي يعمل كدة.. متشتغلش معاه تاني..
أما اللي يبعتلك فيدباك علشان تستفيد وتخلي بالك المرة اللي جية... ادعي له
متزعلوش م الفيدباك.. في كل الأحوال بنتعلم  
 نقلًا عن الاستاذة / حمدية حسن 
أدمن رابطة المترجمين الفريلانسرز